सरकार उदार; एसटीला भक्कम आधार!

मुंबई : एसटी महामंडळाला राज्य सरकारच्या दोन निर्णयांमुळे मोठा आधार मिळाला आहे. अमृत ज्येष्ठ नागरिक आणि महिला सन्मान योजनेतील प्रतिपूर्ती रक्कम म्हणून राज्य सरकारने तब्बल १ हजार ४०० कोटी रुपये एसटी महामंडळाला अदा केले आहेत. त्यामुळे गेल्या आठ महिन्यांपासून प्रलंबित असलेली थकबाकी मिळाल्याने एसटी महामंडळाला दिलासा मिळाला आहे.

राज्य सरकारने ७५ वर्षे पूर्ण झालेल्या ज्येष्ठ नागरिकांना सर्व प्रकारच्या एसटी बसमधून मोफत प्रवासाची घोषणा केली होती. तसेच महिला सन्मान योजनेअंतर्गत राज्यातील सर्व महिलांना एसटी प्रवासात सवलत देण्यात येत आहे. या दोन योजनांमुळे एसटी प्रवासीसंख्या मोठ्या प्रमाणात वाढली आहे.

एप्रिल ते नोव्हेंबर या आठ महिन्यांत एसटीने तब्बल ५९ कोटी ३९ लाख महिलांनी तर १७ कोटी ७ लाख ज्येष्ठ नागरिकांनी प्रवास केला आहे. सरासरी पाहता दररोज सुमारे २० लाख महिला आणि ७ लाख ज्येष्ठ नागरिक एसटीने प्रवास करत आहेत.

ऑगस्ट २०२२ पासून सुरू झालेल्या या योजनांमुळे एसटी प्रवासाला मोठ्या प्रमाणात प्रतिसाद मिळत आहे. ७५ वर्षे पूर्ण झालेल्या ज्येष्ठ नागरिकांना सर्व प्रकारच्या एसटी बसमधून मोफत प्रवासाची सुविधा देण्यात आली आहे. तसेच महिलांसाठी महिला सन्मान योजना लागू करण्यात आली आहे.

या योजनांमुळे एसटी महामंडळाच्या उत्पन्नावर परिणाम झाला असला, तरी राज्य सरकारकडून मिळालेल्या प्रतिपूर्तीमुळे महामंडळाला आर्थिक स्थैर्य मिळाले आहे. एसटी महामंडळाच्या दैनंदिन कामकाजासाठी ही मदत महत्त्वाची ठरत आहे.